In de fufzicher Johre hat mer kenne im Dorf wohne un in Temeschwar in die Schul gehn. So sin ich johrelang mitm Morjetszugg uf Temeschwar gfahr un mitm Owedszugg zuruck uf Schandrhaas kumm. Des hann net nor Schulkinner gemacht, aach villi Arweiter sin hin- un hergfahr. Mer hat uns Hinunherfahrer genennt. For uns war e „Pendler“ jemand gwen, wu ufghong is gin un am Galje gependelt hat.
Wann’s aach nor so um die 35 Kilometer ware, hat die Fahrt doch e guti Stund gedauert, weil de Zugg in Billed, Betschkeret (Kleinbetschkeret) un Bschenwa (Neubeschenowa, heute Dudeştii Noi) anghal hat, weil dort Schiler, Arweiter, Fratschlerinne un anri Stadtfahrer in- un ausgstie sin.
Nohm Fahrplan is de Morjetszugg im Summer paar Minute noh sechs Uhr in dr Schandrhaaser Bahnstation stehngeblieb, im Winter etwas, awr net vill später. Manchesmol is’r awr aa mit Vrspätung kumm, un manchesmol aa zu frieh – vun dem werd noch die Redd sin.
Ich sin um finf Uhr ufgstann, hann mr schnell de Schlof aus de Aue gewäscht, hann mei Schultasch ghol und sin geger de Bahnhoff losgang. Mei Oma hat schun vorher e Senwitsch oddr e Butter- oddr Fettbrot ingepackt, un aa e Appl oddr e paar Quetsche drzu getun, wann se grad zeitich ware. Des war mei Jause un mei Mittachesse for de ganze Tach, un ’s Wasser vum Wasserhahn hat gut drzu gschmeckt.
De Owedszugg hat mich so gegr finf Uhr widr hemgebrung un mei Oma hat e gutes Owedesse uf de Tisch gstellt. Noh’m Esse hann mer noch vrzählt, vun was am Tach passiert is, dann sin ich frieh schlofe gang, weil ich frieh ufstehn hann misse, sechsmol in dr Wuch. Am Sunntach hann ich derfe schlofe un hann manchesmol sogar e Gawlfrustuck griet: Mit Zwiwle gedienschtes Blut un Lewr vun ’me Hinkl, wu an dem Tach gschlacht is gin.
De Wech vun unsrem Haus bis zum Bahnhoff kennt ich heit noch ganz genau beschreiwe – na ja, die Plaschterzigle sin sicher erneiert odr mit Ziment ersetzt gin. Zwaa Heiser vun uns hann ich misse iwr die Gass gehn, dann die Heiser entlang bis zu dr Uiheler Gass. Dort sin ich beim Vettr Juri langschtgang. Er hat spätr erwähnt, dass er sei Uhr noh dem setze hätt kenne: ’s war dreiviertlsechs, wann er mei Schritte unner seim Finschter gheert hat. Dann sin ich zu dr Gassekreizung kumm, wu ich bei gutem Wetter hann kenne iwr de ungeplaschterte Fußwech direkt iwr die Gass gehn. Bei schlechtem Wettr hann ich misse dem geplaschterte Wech newer de Heiser folche. Dann noch e korzi Gass zum Dorfend un weiter zum Sportplatz, un ufm Kieslwech newer’m Sportplatz bis zu dr Station.
Im Summer hann ich net brauche ins Wartezimmer gehn, weil ich jo e Monatskart ghat han un ke Kart am Schalter han lese misse. Wann’s Wetter schlecht war, hann mer uns im Wartezimmer zammgedrängt, un manchi han drzu noch geraacht. Uf nichtre Maa war des for die Mitfahrer schun e Qual.
Ich erinner mich noch immer gere an sunnichi Täch, mit weit uffene Finschtre im Waggon, wu Gruppe vun Mädle un Buwe beinannergsitzt un ihre scheene Lieder gsung hann. Dann ware aa schlechti Täch, wu alli Waggonfinschtre zu ware un die Luft voll Zigarettlraach war. Oder han die Fratschlweiwer zu vill gequatscht, wann die Hinunherfahrer schlofe han wille.
Emol im Herbscht hann ich de Zugg schun gheert, wie ich noch netmol die Uiheler Gass erreicht han. Ich hann angfang zu laafe, awr de Zugg hat die Station vor mir erreicht. Wie ich beim Sportplatz ankumm sinn, war ich ganz außer Ochtm un hann nor gsiehn, dass de Zugg abgfahr is. Ich hann doch de Schultach net verseime wille, awr de Stationschef hat sich net an de Fahrplan ghal un hat de Zugg zu frieh wegfahre geloss. Ich hann mer fescht vorghol, dass ich nie widr mit dem Zugg zuwett laafe werd.
In ’me Winter war’s Hinunherfahre wirklich schwer, un so han ich mol e paar Wuche mit zwaa Schandrhaaser Buwe in Temeschwar gewohnt. Mir ware alli Untermieter bei der Erschineni, in e Kellerwohnung, net weit vun der Maria. Wann mer die Treppe runnergstieh is, is mer in die Kuchl kumm, dann war links unser Zimmer un rechts die Wäschkich, wu die Erschineni sich ufghal hat. In „unsrem Zimmer“ han die zwaa Buwe ’s Dopplbett ghat un ich hann ufm Diwan gschlof. Wie die paar Wuche rumm ware, war ich froh, dass ich widr hin- un herfahre hann kenne.
Ich sin so um siwe Uhr in Temeschwar ankumm, sin dort in die Elektrisch ingstie und bis zum Haiplatz in die Fabrikstadt gfahr, wu die Schul war. Jedes Monat hann ich mer e Monatskart for die Eisebahn un e anri for die Elektrisch kaafe misse. Wann ich heit dran denk, weeß ich wirklich net, wie ich Zeit for des alles gfunn hann. Mer war halt jung un hat e Ziel vor Aue ghat. Schun frieh hann ich mer e Spruch zu Herze ghol: Was dich net umbringt, macht dich stärker!
E zeitlang han mer jede Morjet drei Mädle vun Bschenwa vum Bahnhoff bis zu ihre Schul bei der Maria begleit. Ens vun dene Mädle war bsondersch nett in ihrem schwarze Schulkleid mit ’me weiße Kraa. Ich hann se immer gere gsiehn un des hann aach anri Hinunherfahrer bemerkt. Do druf hann manchi se ganz eenfach mei Freindin genennt. Leidr hat des Hin-un Herfahre e näheri Freindschaft unmeglich gmacht.
An so manche Nohmittäch hann ich mit ville anre Schiler beim Temeschwarer Bahnhoff uf de Owedszugg gewart. Mei zwaa Klassekumrade un ich hann versucht, mit e paar Mädle ins Gspräch zu kumme. Die Zeit is awr zu schnell vergang un jeder hat misse in sei Zugg insteije un hemfahre: die Mädle uf Sacklas, mei Kumrade uf Bakowa, un ich uf Schandrhaas. Mir hann uns vertreescht, ’s Schuljohr hat jo noch vill anre Täch ghat. Des ware domols unsre Freindschafte, die bleiwe bis heit scheene Erinnerunge.