Was wär a Neijohrsowed ohne die „Fledermaus“, in Temeschwar kann mr sich des nit vorstelle. Genau so geht’s um Veddr Nick Tullius in Kanada noch immer.

Noh‘m Zweite Weltkriech is Elektrizität ins Dorf kumm un immer mehr Leit han Radios ghat. Mir Dorfkinner hann ausser Volksmusich aach klassischi Musich gheert un efter aach Musich aus Operette un Opern. Manchi Lieder vun de Operette ware so ähnlich wie die Lieder wu jedes Kind gekennt hat. Weil se meischt vun gute Singer gsung sin gin, sin se schnell bekannt gin. Melodieje vun Johann Strauss seiner „Fledrmaus“ hann villi vun uns gekennt un manchmol aach mitgsung. Die Arien aus Opern ware etwas seltener am Radio un villeicht aach etwas schwerer zu vrstehn, weil se oft net uf deitsch oddr rumänisch gsung sin gin. Mer hat de Sänger ihre gwaltiche Stimme bewunert. Bicher iwr de Inhalt, also um was sich die Operen oddr Operette drehe, ware kaum zu finne. Mit dr Zeit hät ich die Vorstellunge doch gere in dr Staatsoper gsiehn.

Im Lyzeum vun Temeschwar hann ich a Freind ghat, dem sei Vattr e Sänger bei dr Staatsoper war. Er hat die Opern un Operette gut gekennt un hat als „Figurant“ bei der Oper mitgmacht. Er hat mich zu Vorstellunge in dr Staataoper ingelad, awr weil ich e Pendler zwischn Dorf un Stadt war, war so e Bsuch net meglich. Ich hann am Radio dr Musich vun Oper un Operette zugheert, wann’s nor meglich war.

Wie ich dann im erschte Johr vum Temeschwarer Polytechnikum war un im Studenteheim gewohnt hann, hat’s sich rausgstellt, dass drei oddr vier Mitstudente Interesse an dr Oper ghat hann. Mir hann unser Geld zammgspart un hann reglmäßich die Oper bsucht. Wann die Oper am Montach ihre Kassa ufgemacht hat, war eener vun uns dort un hat for uns alli Karte for die Wuch gekaaft. Die Studentekarte ware billich, weil unsre Sitze ganz owwe ware, in dr Gallerie, uf rumänisch aach „cucurigu“ genennt. Dort hann mer in dr erschti Reih gsitzt, wu Akkustik un Aussicht doch fascht so gut ware, wie ufm zweite Balkon, gleich unner uns.

Am Anfang ware die „Fledrmaus“ un anre Operette wie „De Zigeinerbaron“, am eenfachschte zu vrstehn. Wann mer die Opern awr mehrmols gheert hat, hat mer immer mehr vrstan wie die Singstimme un ‘s Orchester die tiefschte menschliche Gfiehle erzeicht hann. Des war wie e Wunner un mer hat’s misse erlewe, weil mer ‘s kaum beschreiwe kann.

Mit dr Zeit hann ich ville Opern kennegelernt, vor allem die itlienische: vun Verdi (Aida, Rigoletto, Traviata, Trovatore, u.a.); Puccini (Tosca, La Bohéme, Manon, u.a.), Leoncavallo (Pagliacci). Dann aach Bizet (Carmen), Tschaikowsky (Onegin). Wagner hann ich erscht später im Lewe kennegelernt, meischt vun Tonträger (Vinyl, CDs, DVDs).

Die Sänger un Sängerinne wu uf dr Biehne gstan hann, ware net beriehmt wie Maria Callas, Victoria de los Angeles, Tito Gobi, Mario Lanza oddr Caruso, die wu mer im Radio hat kenne heere, awr weil mer die Opern efter gheert hat, hat mer immer feinere Details begreife kenne. Mer hat gelernt, wie die Gefiehle wie Freid un Angscht, Lieb un Eifrsucht, dorch die Stimm un Musich so zum Vorschein kumm sin, wie in sunscht keener anre Vorstellung. Des war e neiji Entwicklung vun unser eigeni Gfiehle un e guti Erholung vun dem vollgepackte tägliche Studium. Des is heit schwer zu erkläre, bleibt awr eeni vun de schenschte Erinnerunge an mei Jugend in unsrer scheni Stadt Temeschwar.

Spätr im Lewe, in dr Großstadt Montréal, hann reglmässiche Vorfiehrunge vun Opern iwrhaupt net stattgfun, weil e Opernhaus gar net existiert hat. Fantastisch teire Produktionen, wie „Aida“ mit Elefante, Kamele und Pherd, hat’s irgendwu in dr Welt gin, awr die ware selten, un mer hat se hechschtens im Fernsehen gsiehn kenne.

E scheni Erinnerung bleibt for mich die Vorstellung vun dr „Fledrmaus“ am Neijohrsowed. Des war schun domols e scheni Tradition in Temeschwar, wu aach heit noch besteht. Mir Studente hann in dere Johreszeit immer die Semester-Abschlusspriefunge ghat, awr ich hann’s doch efter gschaft, an dem Owed in die Oper zu gehn. Die „Fledrmaus“ hat ‘s Gedächtnis ufgfrischt un mich dran erinnert, dass es ausser de Priefunge aach noch e Lewe git, awr dass ‘s Studium unbedingt notwendich war, for des späteri Lewe schener zu mache.

Die erschti Neijohrsowede in dr neiji Welt ware eensam un alleen, dann sin die Erinnerunge an die „Fledrmaus“ in dr Temeschwarer Oper immer ufgetaucht, un ihre Refrain war doch so notwendich: „Glücklich ist, wer vergisst, was doch nicht zu ändern ist……“