De Nikolaus Tullius aus Kanada hat uns gschrieb, wer die wirkliche Helde no’m Kriech ware:
Mei Oma, Katharina Lukas, geboreni Beitz, is am 3. September 1883 in Uihel (Neusiedel auf der Heide) uf die Welt kumm, is am 28. November 1957 in Schandrhaas (Alexanderhausen) gstorb un is dort ufm Kerchhoff geger Uihel begrab.
Im Jänner 1945 sin die Schandrhaaser Fraue un Männer uf Russland verschleppt gin. Mer hat se uf Perjamosch getrieb, for se inwagoniere. Wie se dort in eener Schul ingsperrt ware, is mei Oma zu Fuß uf Perjamosch gang, for meiner Mutter ihre Wintergwand bringe. Ufm Hemwech is se ausgeritscht un hat sich e Fuß gebroch. Sie hat net kenne ufstehn un war schun vum Schnee zugedeckt, wie e Schandrhaaser se iwr’m Vorriwerfahre gsien un mit seim Waan hem gebrung hat. Drhem hat se sechs Wuche lang mit starke Schmerze im Bett gelee, e Dokter war im Dorf net zu fine un de Sanitäter hat de Fuß in eener schlechti Position heele gelosst. So hat Oma noch 12 Johre lang mit me krumme Fuß dorchs Lewe gehn misse.
In dere Zeit war mei Vattr Kriegsgfangener in England. Wie er erfahr hat, dass er in Rumänien ingsperrt werd, wann’r hemkummt, hat er uns gschrieb, dass er im Westen bleiwe will. Oma hat ingsiehn, dass des am beschte is, weil er uns vun dort aach besser helfe hat kenne. Er hat uns Pakete gschickt, die wu die Oma hat misse in Temeschwar abhole un de Zoll zahle. Wie de Zoll immer teirer is gin, hann mer ne nimmi zahle kenne un hann die Pakete instelle misse. Geld schicke hat sich net ausgzahlt, weil’s Lei umgewechselt is gin un die ware kaum e Zehntel vum Wert.
For unser Haushaltgeld ufbessre, hat mei Vattr vrlangt, dass die Oma sei Habselichkeite vrkaaft. Zuerscht is die Howwelbank vrkaaft gin, dann de Kaschte un des anri Tischtlerwerkzeich, spätr sei Anziech, sei Schuh, sei Glanzstiwle un anres Gwand. E Schwein hann mer net mäschte kenne, awr e halwes Schwein hat Oma noch johrelang jedes Johr kaafe kenne.
Ich war in dr Schul, wie die erschte Kranke vun Russland am Bahnhoff ankumm sin. Sie hann die Nachricht gebrung, dass mei Muttr im April 1945 in Stalino dem Typhus zum Opfer gfall war. Ich sin vun dr Schul hemgelaf un hann mit meiner Oma ufm Diwan gsitzt un gekrisch. Dann hat Oma sich ufgerafft, hat mich fescht umarmt un hat gsaat: „Mei Kind, mei Lewe gheert jetz dir, ich werd mache was ich kann, for dir Mutter un Vattr ersetze.“
Unser Lewe hat misse mit zwaa Persone weiter gehn. Mei Oma hat jede Tach Frustuck, Mittachesse un Nachtesse uf de Tisch gstellt. In dr Speis ware noch Speckseite un Schunke, un aach e volle Fettstänner. Oma hat jedi Wuch Brot gebackt, Kuche an Suntäch un anri Mehlspeise an Feiertäch. Sie hat jede Taa ihre Liter Millich kaafe kenne un manchmol aa noch e Stick Butter. For mich war des es beschti Esse vun dr Welt. Mei Oma hat immer die Zutate gfun, for gutes Esse, Kuche un Mehlspeis mache. Dass mei Muttr in Russland gstorb war, hann ich eenfach net glawe kenne. Noch langi Zeit hann ich jede Owed gebet, dass se bald widr hemkummt.
Die Oma hat ihre Nähmaschin mit ihrem gsunde Fuß betrieb, de ganze Tach, manchmol aa in die Nacht. Sie war im Dorf als Schneiderin angsien un hat vill Kunschafte ghat. Sie hat weiter die Zeitung abonniert, vum Sonntagsblatt bis zu dr Temeswarer Zeitung. Ich erinner mich an so manchi Owede, wu se am Tisch gsitzt hat, es Petroleum Licht hat gebrennt, un sie hat mir etwas aus dr Zeitung vorgelest, bis ich ingschlof sin. Ich sin e Leser gin, schun bevor ich selwer richtich lese hann kenne
Wie die Zeit drzu kumm is, hat Oma mich in die Schul ingschrieb un aach for extra Rumänischstunde beim Direktorlehre. Mit dere neiji Sproch sin ich schnell zurecht kumm, dr Direkor un mei Oma hann mich oft for mei gute Fortschritt in dem rumänische Unerricht gelobt.
Wie ich die Dorfschul absolviert hann, hat de Direktorlehre Oma iwrzeit, dass ich ins Lyzeum gheer un mer dort e Stipendium sicher wär. Er hat e rumänisches Lyzeum gewählt, weil er net sicher war, ob e deitsches Lyzeum iwrlewe un Stipendien vergin werd. Oma hat mich zu dr Aufnahmepriefung uf Temeschwar begleit, ich sin ufghol gin un hann mei Klasse als Pendler zwischn Schandrhaas un Temeschwar angfang. Ich hann e Stipendium kriet un hann kenne weiter drhem bei Oma wohne. Nohm dritte Johr hat’s Lyzeum mich zum Abitur (bacalaureat) vorgschla un mir hann des Geld for e viertes Johr spare kenne. Weil mei Abiturnote iwr 90 Prozent ware, sin ich ohne Aufnahmepriefung in die Elektrotechnischi Fakultät vum Temeschwarer Polytechnikum ufghol gin.
Mei Vattr, wu domols in England war, hat mich im Brief gfrot, ob ich sicher sin, dass ich die finf Johre dorchmache kann. Mei Oma hat nor gsat, ich soll mei Schule weiter mache, aach wann ich jetz uf Temeschwar ziehe muss. Um sie brauch ich mich net sorche, sie werd immer zurecht kumme. Natierlich soll ich so oft wie meglich hem uf Besuch kumme.
Die Johre 1952 bis 1958 hann ich in vrschiedene Studenteheime in Temeschwar vrbrung. Jede zweite oddr dritte Samschtach sin ich uf Schandrhaas hemgfahr. Oma hat sich immer gfreit un ich hann mich dort gut gfiehlt un erhol. An des Zuggfahre war ich jo vun meine Pendlerjohre gwehnt.
Wie ich im Herbscht 1957 mol widr drhem war, is mer ufgfall, dass etwas annerscht war. Oma hat wirklich krank ausgschaut. De Dokter hat e Operation vrordert, awr Oma hat nix drvun wisse wille. Ihre Antwort war: „Niemand werd an mir rum schneide!“ Des war kuraschiert wie immer, awr desmol leidr ke gute Entschluss.
Wie ich an näkschte Samschtach im November 1957 widr drhem war, hann ich gsiehn, dass es Oma schlechter geht. Sie hat wahrscheinlich geahnt, dass mer villeicht ‘s letschtimol beinaner ware. Beim Abschid am Montachmorjet hat se mich fescht umarmt un hat gsaat: „Du musst stark bleiwe, mei Kind!“ Mir hann alli zwa Träne in de Aue ghat un ich hann ihr versproch, dass ich stark bleiwe werd. Später in dere Wuch sin ich verständicht gin, ich soll sofort hem kumme, weil mei Oma nimmer ufgstann is.
Bei dr Totewacht un bei dr Leicht (Begräbnis) sin ich wie im Schlof mitgang. Erscht später, wie ich widr in Temeschwar war, is alles, was passiert war, ingsunk: Ohne mei Oma war des Haus in Schandrhaas leer, ich hann jetz wirklich ke Drhem mehr ghat. Oma hat die scheene Johre wu se verdient hat, net erlewe derfe. Die schwere Johre hann ich nor mit ihre Hilfe iwrstan, un ich hann drmit gerechnt, dass ich noh meiner Absolvierung endlich etwas drvun zuruckzahle kann. Ihre Tod is unerwart un vill zu frieh kumm, un hat mei Lewe ganz aus’m Normale geriss. Wie ich zehn Johr war, hann ich mei Mutter in Russland verlor, un jetz hann ich mit 22 mei Oma vrlor, wu mit unendliche Opfre mir die Kindheit un friehi Jugend vrscheent hat. Des hat mich wie e grausames un unverdientes Schicksal getroff un ich war net sicher, wie ich mit dere Ungerechtichkeit weiterlewe kann.
Solchi Gedanke hann mer de nächste Semester zum schwerschte in meine finf Johre Polytechnikum gemacht. Awr weil ich meiner Oma vrsproch hann, dass ich stark bleiwe werd, hann ich vrsucht, mei Vrspreche inzuhale.
In dr erschti Hälft vun 1958 war ich im zehnte Semester un nor mit meiner Diplomarweit (Thesis) beschäfticht. Die Arweit hat mit Forschung un Entwicklung zu tun ghat. Des hat mer gholf, ich hann mich widr ufgerafft un im Juni hann ich die Staatspriefung mit dr Beschtnote bestan un mei Ingenierdiplom kriet. Die Freid, dass ich mei Ziel erreicht hann, war gemischt mit dr Trauer, dass mei Oma des net derfe erlewe. Ich war de erschte Schandrhaaser, wu’s Temeschwarer Polytechnikum absolviert hat, un uf des wär Oma scher stolz gwen.
Oma hat sich immer for mich ingsetzt, ohne uf sich selwer ufpasse. Ihre Ziel war, dass ich mei Fähichkeite so weit wie nor meglich entwickle kann, was vorm Kriech aach meine Eltre ihre ausdrickliche Wunsch war. Mir hann des Ziel mitnanner erreicht; ich war gut vorbereit, for mei Inschenierberuf iwrall in dr Welt ausiewe. In schwere Zeite hat se mir e friedliches Drhem un e scheni Jugend ermeglicht. Bis ich 22 Johr alt war, war se aus meim tägliche Lewe net wegzudenke. Sie war mei Großmutter, un in kritische zwelf Johre lang aach Mutter un Vattr. Bei ihr war ich Drhem, dort wu ich hingheert hann un wu ich mich wohl gfiehlt hann. Ihre Lewe war mir e Vorbild, wie mer schweri Johre iwrlewe kann. Sie hat mir de Wech zum gute Menschelewe gewies. Vun ihr hann ich gelernt, wie mer sich e Ziel setzt un’s mit Geduld un Ausdauer erreiche kann. Ohne ihre Hilfe kann ich mir mei Lewe garnet vorstelle, es wär sicher annerscht vrlaf, wann ich iwrhaupt iwrlebt hätt. So lang wie aach nor e Spure vun mir in dr Welt bestehe bleibt, werd mei Oma net vergess sin.